O alcalde de Vigo, Abel Caballero, reclamou este martes á Xunta de Galicia “toda a información” sobre o anteproxecto do túnel de Beiramar antes de convocar a Comisión de Infraestruturas para falar desta obra.
Nun audio gravado e difundido aos medios de comunicación, o rexedor asegurou que o Executivo galego enviou ao goberno local unha carta na que se informaba sobre o cálculo do custo que suporía o túnel de Beiramar, máis de 100 millóns de euros.
Caballero solicitou saber a que zonas afectará, como se deseñará o túnel e demais información que teña dispoñible a Xunta, polo que remitiu unha nova carta á Consellería de Vivenda e Planificación de Infraestruturas para pedila.
Así mesmo, subliñou que a prioridade actual do Concello é o túnel de Elduayen, asegurando que ambas as obras “están paradas na Xunta de Galicia”.
Noutra orde de cousas, tamén noutro audio enviado aos medios de comunicación desde o gabinete de Alcaldía, Caballero indicou que o goberno local aprobou a licenza para un edificio de 38 vivendas que se proxecta na ampliación de Navia, a cal fora reclamada en varias ocasións pola Xunta.
