O Concello de Redondela solicitou ao Ministerio de Política Territorial e Memoria Democrática a declaración da Illa de San Simón como Lugar de Memoria Democrática.

En concreto, a xunta de goberno local acordouno por unanimidade en base ao establecido na lei de memoria democrática. Así, a alcaldesa, Digna Rivas, explicou que a este recoñecemento poden optar aqueles espazos, inmobles ou patrimonios culturais inmateriais no que se desenvolveron feitos de singular relevancia pola súa significación histórica, simbólica ou pola súa repercusión na memoria colectiva, vinculados á memoria democrática, así como coa represión e violencia sobre a poboación como consecuencia da resistencia ao golpe de estado de xullo de 1936, á Guerra, a Ditadura, o exilio ou a loita pola recuperación e profundización dos valores democráticos, entre outros.

Ela lembrou que entre 1936 e 1943 este illote acolleu un dos maiores campos de concentración e de exterminio do franquismo, polo que “cumpre sobradamente con estes criterios”.

Respecto diso, indicou que a lei establece a creación dun inventario con todos os lugares que conten con esta declaración para dalos a coñecer. Ademais, recolle que as administracións públicas titulares de bens de Memoria Democrática estarán obrigadas a garantir a súa perdurabilidad, identificación, explicación e sinalización adecuada.

Nun comunicado, o Concello explicou que realiza esta petición ao Ministerio tras reunirse con responsables da Iniciativa Galega pola Memoria, onde se insistiu na necesidade de protexer a illa para evitar que se realicen nela actividades lucrativas “que supoñen unha ofensa para a memoria das vítimas”.