O BNG de Vigo alertou este martes de que o goberno municipal que preside Abel Caballero “segue sen garantir o mínimo de bombeiros” na cidade, e advertiu de que o programa de servizos voluntarios fóra da xornada aprobado en agosto pasado é un “parche insuficiente”.

Nun comunicado de prensa, o grupo municipal nacionalista subliñou que esa medida non resolveu a “falta estrutural” de persoal no servizo de bombeiros de Vigo e lembrou que o parque de Coruxo pecha de forma “intermitente”, e deixa “desprotexida” a metade da cidade, alongando os tempos de resposta en caso de emerxencias, ademais de comprometer a seguridade dos propios bombeiros.

O grupo municipal do BNG criticou que o goberno local segue sen responder os seus requirimentos sobre esta situación na Comisión Informativa de Seguridade, polo que anunciou que pedirá “todos os rexistros de xornada desde o 27 de agosto” para “comprobar o número real de efectivos no servizo de bombeiros” no último trimestre.

“Temos que seguir insistindo en que Vigo sen bombeiros non é segura”, subliñou o portavoz municipal do BNG, Xabier Pérez Igrexas, que reclamou “medidas estruturais e de fondo” para que o servizo de bombeiros teña o persoal necesario, e acorde cunha cidade de 110 quilómetros cadrados e case 300.000 habitantes.