O BNG de Vigo urxiu ao goberno municipal a elaboración dun plan municipal de acción contra as inundacións, un documento que tería que estar elaborado no período 2021-2022, pero do que, a día de hoxe, “non se coñecen avances, a pesar do seu carácter obrigatorio”.
O portavoz do grupo nacionalista no Concello olívico, Xabier Pérez Igrexas, lembrou que na cidade hai identificados ata 50 zonas de risco de inundación, segundo recóllese nas previsións do Plan Xeral, concentradas fundamentalmente na contorna dos ríos Lagares, Barxa (en Sárdoma) e en zonas do litoral.
O plan, sinalou o edil nacionalista, debe recoller medidas concretas, máis aló de actuacións parciais e puntuais de mellora na rede de saneamento.
Así, o BNG interpelará ao alcalde na próxima Comisión Informativa de Fomento para urxir a elaboración deste plan que, sinalaron os nacionalistas, debe ir acompañado de “unha actualización do Plan Municipal de Emerxencias” do Concello.
Por outra banda, este grupo municipal pediu tamén a “máxima cooperación” entre o Concello olívico e a Xunta de Galicia apar avanzar nas medidas estruturais definidas por Augas de Galicia en 2020, entre elas o Plan de Acción; e reclamou tamén unha mellora da rede de saneamento para “implantar dunha vez a recollida separada de augas pluviais e residuais”.
