InicioPolíticaBreve historia da Pass Vigo: a tarxeta de bus urbano que non...

Breve historia da Pass Vigo: a tarxeta de bus urbano que non é só para os vigueses por decisión xudicial

O alcalde de Vigo considera que a obrigación de permitir que os veciños de Redondela ou Mos poidan utilizar a tarxeta é un "ataque directo de Feijoo" e que el debería pagar o "custe astronómico" da medida, que estima en centos de miles de euros.

PUBLICADO O

- Advertisement -

Un auto xudidicial puxo en guerra ao Concello Vigués contra a Xunta e os limítrofes de Redondela e Mos, do PP. E todo, tras darlle a razón o contencioso-administrativo número 1 de Vigo, ao Concello de Redondela que obriga  ao de Vigo a eliminar a restrición do empadroamento á hora de outorgar as tarxetas para a bonificación do bus urbano, que até agora tramitaba só para censados na cidade.

Segundo o auto, o Concello de Redondela presentou un contencioso despois de facer un requirimento previo á Xunta de Goberno de Vigo que non tivo resposta. No devandito contencioso solicita que se elimine a esixencia de estar empadroado na cidade olívica para poder ser beneficiario da tarxeta PassVigo, que permite bonificacións no servizo de bus urbano.

O maxistrado sinala na súa resolución que esta esixencia (que deixaría fóra das subvencións a centos de usuarios, especialmente da parroquia redondelana de Chapela, até onde chega o bus de Vitrasa) non está especificamente recollida nin no convenio asinado entre o Concello de Vigo e Abanca para modernizar as tarxetas, nin nas instrucións aprobadas en Xunta de Goberno local para tramitar as solicitudes da PassVigo.

Así mesmo, xustifica a suspensión dese requisito porque, mentres non se resolva o contencioso, “os prexuízos derivados de manter a esixencia de empadroamento xeraríanse continuadamente a un número indeterminado de persoas”, non só de Redondela, senón de calquera outro lugar de procedencia.

Por contra, a eliminación dese criterio, que vén sendo de facto un “adiamento da entrada en vigor”, causa “tenues prexuízos” ao Concello de Vigo ao que, no caso de que os tribunais déanlle a razón, “bastaríalle con anular as tarxetas” dos non censados na cidade.

No auto sinálase que a medida de esixir o empadroamento para tramitar a tarxeta conculca a lei 2/2017 da Xunta (de acompañamento aos orzamentos dese ano), así como a lei 16/1987 de ordenación do transporte terrestre, e o Regulamento de Servizos das Corporacións Locais.

“LEI CONTRA VIGO”

O alcalde da cidade olívica, Abel Caballero, atribuíu dita resolución á lei 2/2017, a unha norma “concreta e específica feita por Feijóo para que Vigo lle pague o bus a todos os que veñen de fóra á cidade”.

Así avanzou que o seu goberno municipal utilizará “todos os mecanismos para defender Vigo contra os ataques de Feijóo” e expresou o seu convencemento de que, ao final, gañará esta pugna nos tribunais, porque esa lei de acompañamento é “inconstitucional” e atenta contra a autonomía municipal.

No entanto, lamentou que, “polo camiño”, a decisión xudicial custará “centos de miles, ou mesmo millóns de euros” aos cidadáns vigueses. “O custo será astronómico e terá gravísimas repercusións nas arcas municipais”, proclamou, e engadiu que esta “condena” é “o agasallo” de Feijóo aos vigueses.

Así, estimou que, soamente estendendo a tarxeta PassVigo a veciños de Chapela, o custo estará entre 100.000 e 150.000 euros para os bonos normais, sen contar os de estudantes, pensionistas ou bonos sociais (estes últimos viaxarían gratis).

O rexedor acusou directamente ao presidente da Xunta de porse “de acordo” cos alcaldes do PP de Redondela e Mos (ambos do PP), para, despois de que Vigo anulase o convenio do transporte metropolitano, introducir na lei 2/2017 criterios que impiden tramitar bonos de transporte con esixencias de empadroamento. Unha decisión que fixo que queira declarar a Feijóo “persoa non grata” para Vigo e cualificara ao seu delegado na cidade, Ignacio López-Chaves de “mercenario político”.

“Medida discriminatoria, insolidaria e antisocial”

Pola súa banda, o alcalde de Redondela, Javier Bas, expresou xa a súa satisfacción despois de coñecer o auto do xulgado que obriga ao goberno de Abel Caballero a eliminar a esixencia de estar empadroado na cidade para solicitar o cartón PassVigo.

Bas afirmou que se alegra “enormemente” de que o maxistrado aceptase esta medida cautelar solicitada por Redondela, contra unha esixencia “inxusta” que afecta por centos de veciños deste municipio, especificamente da parroquia de Chapela.

Tamén a rexedora de Mos, Nidia Arévalo, sempre insistiu en que “a substitución da Tarxeta Verde do Vitrasa pola Pass Vigo trátase dunha medida discriminatoria, insolidaria e antisocial, ademais dun ataque directo ás persoas con menos recursos; e é inconstitucional, ilegal e contraria aos principios esenciais de convivencia. É unha situación de discriminación que non se produce en ninguna outra cidade de toda España”.

SOLICITUDES

Tras a decisión xudicial, veciños da parroquia redondelana de Chapela presentaronse xa no Concello de Vigo para solicitar a tarxeta PassVigo, atendendo ao auto xudicial que di que, ao día seguinte de ser notificado, debe deixar de esixirse o empadroamento aos solicitantes.

Os veciños criticaron “as pegas” que se lles puxeron para presentar a solicitude e, após presentar unha queixa por rexistro, entregaron as súas peticións.

A este respecto, o alcalde sinalou que os usuarios “poden solicitar xa” esa tarxeta e que “non se lles nega” o trámite. En todo caso, lembrou que esa xestión leva “uns días” e que serán os técnicos municipais os que determinen como se cursan esas solicitudes de persoas non empadroadas en Vigo.

ÚLTIMAS

A CUT denuncia “escurantismo” na negociación dos bombeiros de Vigo

A CUT criticou este martes a proposta de solución exposta pola mesa de negociación...

A veda do choco nas rías de Vigo, Pontevedra e Arousa estenderase ata finais de outubro

A Xunta estableceu a veda para a captura do choco nas rías de Vigo,...

Detido un veciño de Gondomar como presunto autor de seis roubos con forza en gasolineiras

A Garda Civil detivo a un veciño da localidade pontevedresa de Gondomar como presunto...

Pintadas tránsfobas no centro LGTBI+ do colectivo Avante

O centro LGTBI+, aberto polo colectivo Avante o pasado 4 de maio en Vigo,...