O xulgado do Penal 1 de Vigo acordou suspender a vista sinalada para este xoves contra o presidente da Comunidade de Montes de Cabral, Luís Rodríguez, e outras dúas persoas, como supostas autoras dun delito contra a ordenación do territorio, pola construción dun galpón nunha zona protexida (no ámbito do plan de rexeneración do corredor natural do río Lagares).

Este xuízo xa estivo sinalado para o pasado 18 de setembro, e naquel momento foi suspendido pola necesidade de realizar unhas comprobacións documentais. A vista sinalada para este xoves foi igualmente suspendida, neste caso pola falta dun informe.

A Fiscalía pide para cada un do tres acusados 15 meses de prisión, e multa de 4.500 euros, ademais da demolición da devandita construción e a reposición do terreo ao seu estado orixinal.

Os feitos remóntanse a 2014, cando se iniciaron as obras de edificación do galpón. Tras unha denuncia veciñal, a Policía Local notificou aos promotores que tiñan que parar a obra, xa que non contaban con licenza.

Foi en 2016 cando unha inspección municipal constatou que se estaban construíndo de novo paredes e, no verán de 2017, terminouse o galpón, que quedou unido a outra edificación preexistente a través dunha nova cuberta.

OUTRAS CAUSAS XUDICIAIS

O presidente dos comuneiros de Cabral está ou estivo involucrado noutras causas xudiciais, entre elas unha investigación por un presunto delito contra o medio ambiente, vinculado a uns movementos de terras no nacemento do río Lagares. Nese caso, xunto a Luís Rodríguez, están investigadas tamén outras dúas persoas: un construtor vinculado a Rodríguez e un cidadán de nacionalidade romanesa.

Ademais, o pasado mes de abril, o TSXG ratificou unha condena do xulgado do contencioso-administrativo de Vigo, que confirmaba a sanción imposta contra os comuneiros de Cabral pola Axencia de Protección da Legalidade Urbanística (APLU). O organismo autonómico obrigou á entidade comunal a devolver ao seu estado orixinal unha parcela de 5.400 metros cadrados, á beira das instalacións da ITV (preto do Ifevi), na que se realizaron obras de acondicionamento para alugala como aparcadoiro.

Por outra banda, e antes desa sentenza, entre outras resolucións, un xulgado de Vigo xa fallara en contra dos comuneiros, ao anular o acordo para a cesión de terreos ao Aeroclub para o campo de golf; igualmente, os tribunais reprobaron no seu día á entidade pola expulsión de varios comuneiros hai anos, obrigando á súa readmisión.