Un home de 44 anos de idade, R.C.F., enfróntase a 2 anos de prisión por un delito continuado de ameazas e outro de acoso, tras enviar varias mensaxes ameazantes e insultos a un axente de Policía Local de Vigo, con quen tivera un altercado previo.

O home foi xulgado este xoves na sala do Penal 3 da cidade olívica, e a Fiscalía sostén que acusado e vítima coñecéronse por mor dun incidente de tráfico, no que o procesado atropelou ao axente e houbo un altercado. A partir dese momento, e tras obter o número de teléfono do funcionario, “iniciou unha continua acción de fustrigación”, enviándolle mensaxes de WhatsApp en ton ameazante, o que deu lugar a un procedemento xudicial.

Por outra banda, no que respecta aos feitos xulgados este xoves, o ministerio público expón que o acusado, na Noitevella de 2022 enviou varias mensaxes ao policía nos que o insultaba e ameazaba con expresións como “sen lesións non quedas”, “vouche dar a tunda da túa puta vida”, “teño o teu enderezo”, “ti porco quedas sen chapa polos meus santos collóns” e outros deste tenor.

En atención a estes feitos, pide que sexa condenado a 2 anos de prisión (en xa está no centro penal da Lama por outros feitos) e que, durante 5 anos, non poida achegarse nin comunicarse coa vítima, a quen debe indemnizar en 1.000 euros.

NEGA OS FEITOS

O acusado negou as ameazas, e explicou que, aínda que tiña o contacto do axente, non lle enviou ese tipo de mensaxes. De feito, a súa defensa apuntou que non se acreditou que eses textos de WhatsApp (achegados á causa polo propio denunciante) procedesen do teléfono de R.C.F., xa que non se pediu a súa comprobación, e pediu a súa libre absolución.

Na súa declaración ante a xuíza, o procesado asegurou que non tiña esa aplicación de mensaxes no seu móbil e proclamou a súa inocencia. “Tiña o seu teléfono porque lle compraba droga a uns compañeiros seus policías”, asegurou, e insistiu en que o axente denunciante “estallo inventando todo para prexudicarme”.

A acusación particular, exercida polo policía, reclama unha condena de dous anos e medio de prisión, e unha indemnización de 10.000 euros polos prexuízos causados ao funcionario, que “deu crédito” ás ameazas. Ademais, o letrado do denunciante sinalou que esgrimiu “a defensa clásica do ameazador, do abusón, negar a maior”. “Criamos que viría rehabilitado, pero é o de sempre, vai seguir ameazando e extorsionando. Onde mellor está é en prisión”, resolveu.

OUTRAS CAUSAS

Dáse a circunstancia de que este acusado ten outras causas pendentes, tamén por ameazas e delitos similares, a este axente de Policía e a outras persoas.

En concreto, este mesmo xoves foi xulgado por un delito de inxurias, por remitir numerosos correos electrónicos a varios xulgados do Penal e de instrución de Vigo, dirixíndose aos maxistrados e maxistradas con expresións como “puerco”, “atrasado mental”, “puto anano de merda”, “puta xuíza de merda”, “bébeda”, entre outros.

Por estes feitos, a Fiscalía impútalle dous delitos de inxurias graves á autoridade, e pide que se lle condene ao pago de dúas multas que suman 3.600 euros