A fortaleza do Castro, en Vigo, acolleu este mércores un novo acto reivindicativo en favor da causa palestina promovido pola Coordinadora Galega de Solidariedade con Palestina, no que participaron, entre outros, o secretario xeral da CIG, Paulo Carril, ou a deputada do BNG, Carmela González.

Decenas de persoas concentráronse aos pés da fortaleza, en cuxa muralla se despregou unha gran bandeira palestina, para esixir a “fin do xenocidio na Franxa de Gaza” e rexeitar “o criminal apoio do imperialismo a Israel”.

Durante esta acción simbólica anunciáronse novas mobilizacións “ante o agravamento da situación na zona e para seguir censurando a actitude cómplice e hipócrota dos gobernos español e galego ante o que está a suceder”.

“Con este acto nós dicimos ‘non’. Non á barbarie despregada polo estado terrorista de Israel. A barbarie que levamos meses condenando e que é parte esencia do seu proxecto colonial e expansionista, que trata de esmagar ao pobo de Palestina para ocupar as súas terras”, trasladaron os convocantes nun manifesto, no que tamén afearon a posición dos “grandes medios de comunicación” e a “vergoñosa complicidade” dos gobernos e da UE.