Miles de amantes dos deportes urbanos e de acción enchen un ano máis as rúas de Vigo nas actividades organizadas no marco do Marisquiño.
Este sábado puidéronse ver os primeiros competidores do Descenso Urbano en Moutain Bike, que se desenvolve desde o máis alto do Castro, onde inician a baixada os riders, ata O Berbés, pasando polo Casco Vello.
Do resto de disciplinas previstas para esta xornada destacan o inicio da Clasificación Final da Rexional de Gold Battle Galicia (Galos), en Samil, ou o Basket 3×3, que continúa durante todo o día con partidos de fase de grupos para finalizar a xornada cos cuartos de final. Neste caso, na zona do Náutico. Finalmente, tamén en Samil, poderase gozar das semifinais de Skate, BMX e Flatland (que tamén disputará a final Amateur). Breaking empezará con filtros 1vs1 e os oitavos 3vs3.
Unha vez terminen as competicións, ‘Arnao’ ofrecerá vermut e sesións de DJ ata que empecen os concertos no escenario Vibra Mahou. Comezará Baby Romeo (21.30 horas), seguido de Kyne (22.35 horas), a cabeza de cartel Rusowsky (23.45 horas), Six Sex (00.55 horas) e Sisters of Rave (Teresa Ferreiro & Grarrita) ás 01.40 horas.
