O Concello de Vigo asegurou este martes que a Policía Local “non detectou actividade” do Saltamontes na tarde do pasado venres, horas antes de que se producise o accidente que acabou coa vida do mozo Iván Castaño nas festas da parroquia de Matamá.

Noutro conciso comunicado enviado aos medios de comunicación, o goberno local insistiu en que “tanto o titular da atracción como a comisión de festas” tiveron notificación escrita da falta de autorización para a posta en funcionamento do aparello por non atender os requirimentos de documentación.

“Tras enviar a notificación, a Policía Local trasladouse ao lugar na tarde do venres e non detectou actividade”, indicou agora o goberno local, lembrando que o ocorrido está a ser investigado polo Xulgado de Instrución número 3 de Vigo, que “conta con toda a colaboración do Concello”.

Precisamente o comunicado do Concello chegou escasos minutos despois de que o PP de Vigo denunciase “abandono de funcións” na supervisión da atracción accidentada en Matamá, pedindo “respostas aos interrogantes que hai no aire”.

En concreto, o portavoz municipal ‘popular’, Miguel Martín, asegurou que “non lle convencen” as explicacións ofrecidas polo goberno local. “Resulta cando menos sorprendente que o goberno local pretenda agora lavarse as mans descargando toda a responsabilidade, cando el mesmo recoñece que a atracción sinistrada non cumpría coa normativa vixente ao non ter presentada toda a documentación”, engadiu.

“Se esa atracción non podía funcionar, como é posible que o Concello non fixese máis nada que comunicarllo ao propietario e á comisión de festas?”, sinalou, preguntándose se non sería necesario “mandar á Policía a comprobar se se estaba cumprindo esa orde” e se a atracción funcionada, “como era o caso, non debería instar á súa inmediata paralización e/ou precintala?”.

Por outra banda, o BNG de Vigo solicitou a comparecencia da concelleira responsable de Seguridade, Patricia Rodríguez, así como do xefe de servizo, Antonio Viveiro, para que expliquen o ocorrido.

“Algo tan grave como o sucedido nas festas de Matamá non se pode despachar con comunicados enlatados, sen atender preguntas nin dos medios de comunicación e sen dar explicacións”, reivindicou o portavoz nacionalista, Xabier Pérez Igrexas.