Máis de 200 persoas gardaron na tarde deste mércores un minuto de silencio en Baiona por Santiago Leyenda, veciño da localidade pontevedresa falecido no naufraxio do pesqueiro ‘Argos Georgia’ nas Illas Malvinas.
Foi ante a sede do Concello onde familiares, veciños e amigos reuníronse nun emotivo acto organizado polo goberno local en recordo e homenaxe a un home “vinculado ao mar”, do mesmo xeito que gran parte da súa familia, segundo dixo o concelleiro de Pesca, Joaquín López, encargado de ler o discurso previo ao minuto de silencio.
Tras coñecerse a identidade dos falecidos, o Concello decretou esta mañá un día de loito oficial con bandeiras a media asta e convidou aos veciños a gardar un minuto de silencio, que deu comezo a partir das 20.00 horas.
Alí puido verse á parella do falecido, así como aos seus dous fillos, que estiveron arroupados polos veciños de Baiona, quenes mostraron con pesar, a súa dor polo ocorrido.
“Desde o Concello compartimos a dor e queremos trasladar o noso máis sentido pésame aos pais de Santi, así como á súa esposa Ana e aos seus fillos Marta e Dani”, engadiu López.
Ao acabar o silencio, os asistentes fundíronse nun longo aplauso por Santiago Leyenda, quen exercía de cociñeiro no buque afundido.
Ademais de familiares, amigos e veciños do falecido, ao minuto de silencio acudiron distintas autoridades, como o conselleiro do Mar, Alfonso Villares; o subdelegado do Goberno en Pontevedra, Abel Losada; a delegada da Xunta en Vigo, Ana Ortiz, ou o alcalde de Baiona, Jesús Vázquez Almuiña.
Tampouco o patrón maior da confraría de Baiona, Roberto Cabral, así como o presidente da Cooperativa de Armadores de Pesca do Porto de Vigo (ARVI), Javier Touza, quixeron perderse este acto como mostra de apoio.
Pola súa banda, familiares de César Acevedo, o vigués que tamén perdeu a vida no naufraxio, trasladáronse esta tarde a Baiona para mostrar as suas condolencias cara á familia de Leyenda.
FEITOS
Foi o pasado luns, 22 de xullo, cando a Autoridade Marítima das Illas Malvinas recibiu información de que o pesqueiro ‘Argos Georgia’, con 27 persoas a bordo, estaba a facer auga e solicitaba axuda a unhas 200 millas ao leste de Stanley (Porto Arxentino). Á 16.00 hora local (21.00 horas de España) do luns, a tripulación do buque viuse obrigada a abandonar o barco.
Ao parecer, tal e como informou Salvamento Marítimo, tiña unha vía de auga provocada por un choque na treboada. Finalmente, a tripulación realizou o abandono en tres balsas salvavidas. Mentres, as condicións na zona eran de 35 nós de vento e mar de fondo entre 5 e 6 metros.
A partir de aí comezou a operación de rescate, que logrou atopar aos 14 mariñeiros sobreviventes e nove falecidos, mentres que catro dos tripulantes continúan desaparecidos. Ademais, debido ao mal tempo, as autoridades de Malvinas detiveron esta tarde a procura.
