O grupo municipal do PP no Concello de Vigo denunciou este luns que, segundo recóllese nun informe do interventor, o goberno que preside Abel Caballero deixou 337 prazas de persoal público sen cubrir en 2023 por falta de dotación orzamentaria.
Así o trasladou a concelleira Patricia García nun comunicado, no que sinala que tanto o informe do pasado exercicio como a aprobación da Conta Xeral sinalan que o goberno municipal “incorreu nunha práctica incorrecta”, ao non contemplar partidas orzamentarias para esas prazas. Esa situación, inciden desde o PP, deu lugar a “disfuncións e incoherencias” ao longo do ano na xestión dos recursos humanos do Concello “ao non poder atenderse vacantes de urxente cobertura”.
Patricia García denunciou que, a pesar de preguntar este luns aos membros do goberno nas comisións informativas, non obtivo resposta. Así, sinalou, tras o “tirón de orellas” do interventor, que “é incomprensible que o goberno local non reservase partidas orzamentarias para todo o exercicio 2023 nun número tan elevado de prazas”, e criticou especialmente o caso dos servizos de Bombeiros e Policía Local.
Segundo incidiu a edila do PP, o interventor sinala que “existe posto, pero non praza a pesar de resultar urxente a súa cobertura” para 71 axentes municipais e 22 traballadores do servizo de extinción de incendios. En todo caso, esta falta de dotación orzamentaria da que fala o interventor municipal no seu balance anual afectou a todo tipo de áreas e categorías, engadiu Patricia García.
Tras criticar que o orzamento de 2023 “incumpría a Lei de Emprego Público de Galicia”, o PP reafirmouse nas súas críticas á “nefasta xestión de Abel Caballero”, que “é incapaz de resolver a endémica carencia de recursos humanos no Concello de Vigo”. “Se as contas están saneadas, por que non se inviste no persoal municipal, tan necesaria en todos os departamentos? Por que o diñeiro que debería destinarse ao capítulo 1, o de persoal, acábase derivando a outros fins? Será porque os traballadores do Concello non se poden inaugurar?”, cuestionou a concelleira ‘popular’.
