A ‘start-up’ (empresa emerxente) UARX Space foi recoñecida nos Premios Emprende XXI como a compañía de base tecnolóxica máis innovadora de Galicia.

Estes galardóns que outorgan o Ministerio de Industria e Turismo, a través da Empresa Nacional de Innovacion (Enisa), e CaixaBank, a través de DayOne, a súa división especializada en empresas tecnolóxicas, celebran este ano a súa 17ª edición. A entrega territorial dos Premios Emprende XXI en Galicia conta co apoio da Xunta de Galicia, a través do Igape.

UARX Space é unha empresa de loxística aeroespacial que deseña e fabrica na súa sede en Nigrán sistemas para transportar satélites.

Un dos seus dispensadores, que despregará tres satélites, participará no voo inaugural do foguete Ariane 6, da Axencia Espacial Europea, previsto para este ano.

A directora xeral de UARX Space, Yanina Hallak, recolleu o galardón. O seu proxecto resultou seleccionado entre as 47 candidaturas que se presentaron aos galardóns en Galicia.