A causa contra Carlos F.G., expresidente do Colexio de Enfermaría de Pontevedra, saldarase finalmente cun acordo de conformidade coa Fiscalía, que suporá unha condena de 2 anos de cárcere para o principal procesado, mentres que quedan exoneradas a súa muller e a súa filla, que tamén foron detidas no marco da investigación por presuntas irregularidades na xestión do órgano colexial.

A instrución deste caso comezou en marzo de 2021, cando o presidente do Colexio, a súa muller e a súa filla foron detidos por esas supostas irregularidades na xestión do Colexio, e por utilizar o organismo para branquear diñeiro de empresas da familia. En xullo dese ano, o tres foron postos en liberdade tras pasar tres meses en prisión provisional.

Dáse a circunstancia de que, en setembro de 2021, un xulgado do Social de Vigo declarou nulo o despedimento dun extraballador do Colexio, o responsable de comunicación, e no seu fallo viu acreditada a existencia dunha “armazón empresarial” con “homes de palla” tras a xestión do Colexio. Así, na súa resolución, a maxistrada sinalaba que tras a entidade había unha “armazón” de empresas que se encargaban de diversas cuestións, polo que o propio colexio quedaba “baleiro de contido”.

Carlos F.G., a súa muller e a súa filla estaban detrás de Galaprint, empresa dedicada á impresión e dona do local que ocupa o Colexio; tamén estaban detrás de Xestión Xurídica Galega, que daba asistencia xurídica ao Colexio; e de Instituto Galego de Formación Sanitaria e Promoción Social, que daba cursos aos colexiados; por eses servizos, as empresas cobraron inxentes cantidades de diñeiro. As empresas tiñan, en aparencia, os seus propios administadores, pero eran en realidade homes de palla, segundo apuntábase nesa sentenza do Social.

O xuízo polas irregularidades no Colexio está sinalado para este xoves, na sección quinta da Audiencia Provincial de Pontevedra, con sede en Vigo, aínda que a vista non chegará a celebrarse debido a ese acordo coa Fiscalía.

En virtude do pacto de conformidade, pendente de que se ratifique este xoves en sala, retirarase a acusación contra a muller e a filla de Carlos F.G., e este aceptará unha pena de 2 anos de cárcere por un delito de xestión desleal. O acordo contempla tamén o pago dunha multa de 1.080 euros e inhabilitación por dous anos.