Fiscalía pide oito anos de prisión para un home acusado de apuñalar cun punzón a outro en Vigo, uns feitos ocorridos en novembro de 2022 e cuxo xuízo se celebrará este mércores na sección quinta da Audiencia de Pontevedra.

Segundo narra o escrito de acusación do Ministerio Público, os feitos remóntanse ao 29 de novembro de 2022, cando o acusado acudiu á vivenda da vítima e, coa intención de causar a súa morte, asestoulle unha puñalada cun punzón na íngua esquerda.

Como consecuencia, seccionoulle a arteria ilíaca e causoulle unha ferida duns dous centímetros a través da que se podían ver os intestinos da vítima, co consecuente risco para a súa vida. O ferido foi trasladado ao hospital, onde tivo que ser operado en dúas ocasións e permaneceu ingresado durante un “longo tempo”.

O procesado, pola súa banda, foi detido e permanece en prisión provisional por esta causa desde o 1 de decembro de 2022. Os feitos, para o Ministerio Público, son constitutivos dun delito de homicidio en grao de tentativa, polo que pide para o procesado 8 anos de prisión, así como prohibición de achegarse á vítima por un ano tras o cumprimento da condena e que o indemnice con 43.000 euros.