Un operario faleceu na mañá deste mércores en Vigo ao caer a varios metros de altura desde a cuberta dunha nave, situada na rúa Santa Tegra, en Teis. Unha persoa particular chamou ao 112 Galicia sobre as 09,00 horas deste mércores para solicitar asistencia médica urxente para un operario que acababa de caer desde a cuberta dunha nave.

Con esta información, os xestores de emerxencias pediron a colaboración dos profesionais de Urxencias Sanitarias de Galicia-061, así como de Policía Nacional e Local, ademais do persoal da Autoridade Portuaria de Vigo. Con todo, pouco despois, os axentes de seguridade comunicaron o falecemento do traballador, informa o 112 Galicia.