O alcalde de Vigo, Abel Caballero, reivindicou este mércores que a rede de moi alta tensión para Vigo “ten datas”, asegurando que como moi tarde estará dispoñible en 2026, despois de que o director da factoría viguesa de Stellantis urxise este martes ao Goberno prazos concretos para a mesma.

Nun audio difundido aos medios de comunicación, Caballero insistiu en que o Executivo central modificou o plan de desenvolvemento da rede eléctrica para incluír esta reclamación da industria olívica, que contará cun investimento de 72 millóns de euros.

O rexedor socialista puxo en valor que o Goberno tamén garantirá o acceso de Stellantis a axudas europeas a través do Perte. Ademais, destacou que tanto o Concello como Zona Franca darán vantaxes á compañía para que manteña a súa actividade en Vigo, preguntándose, unha vez máis, “que achega a Xunta”, que “se saca fotos”.

Todo iso un día despois de que o urxise a concreción de prazos para a construción da nova subestación eléctrica e a conexión da planta coa liña de moi alta tensión, sinalando que este servizo é “necesario para a supervivencia da fábrica”.

Bo afirmou que, aínda que xa hai confirmación do Goberno de España de que a fábrica viguesa terá esa moi alta tensión, aínda non hai prazos. “Xa nos gustaría ter (prazos) concretos”, proclamou.