Investigadores da Escola de Enxeñaría Industrial da Universidade de Vigo (UVigo) lideran un proxecto de reciclaxe de vidro a través do desenvolvemento dunha innovadora tecnoloxía de transformación láser.
En concreto, esta iniciativa está liderada polo grupo de Aplicacións Industriais do Láser, LaserON, e trátase dun proxecto europeo denominado EverGLASS, que conta con socios de Eslovaquia, Alemaña e Francia, e con representación española por parte do CSIC.
O obxectivo de EverGLASS -The new role of glass in a sustainable society. Technology for the integral recycling of glass- é transformar a reciclaxe e a utilización de residuos de vidro mediante o desenvolvemento desta tecnoloxía láser, segundo recolle o Diario da Universidade de Vigo (DUVI).
Así, a idea é integrar a reciclaxe no proceso de fabricación de produtos de vidro a medida, ofrecendo unha solución aos desafíos ambientais asociados cos residuos de vidro. A tecnoloxía permitirá aos usuarios introducir residuos nunha nova máquina e seleccionar o novo produto a obter.
Cos profesores Juan Pou e Rafael Comesaña á cabeza, o proxecto conta cun orzamento de case 3 millóns de euros, dos cales uns 783.750 euros son para a UVigo, tras ser seleccionado na convocatoria EIC Pathfinder Open no marco do Horizon Europe.
Precisamente este mércores celebrouse en Vigo a reunión de lanzamento de EverGLASS, á cal asistiu o reitor, Manuel Reigosa. El destacou o “orgullo” que supón para a Universidade que sexa un grupo vigués o que coordine unha iniciativa como esta, que contribúe a unha “Europa máis forte e máis competitiva, que avance na reindustrialización”.
Pou explicou que o actual proceso de reciclaxe de vidro emprega tecnoloxía madura baseada en grandes instalacións que centralizan o proceso. “Isto supón un alto consumo de enerxía para fundir toneladas de vidro mediante un proceso pouco fiable”, indicou, ao que se unen “os custos de transporte do vidro ás grandes plantas de reciclaxe”.
EverGLASS propón desenvolver unha tecnoloxía de reciclaxe ‘in situ’, baseada no emprego de láser. “Poderanse xerar produtos personalizados ou técnicos cun menor consumo enerxético, menor emisión de dióxido de carbono (CO2) á atmosfera e menores custos de transporte”, engadiu.
