O consello de goberno da Universidade de Vigo (UVigo) celebrou este martes a súa última sesión deste ano, na cal se aprobou a proposta de orzamentos da institución académica para 2024, que ascende a unha cifra “marca” de 248,8 millóns de euros.

As contas, que saíron adiante con 38 a favor, tres en contra e dúas abstencións, someteranse a votación este xoves no pleno do consello social para, posteriormente, ser enviadas á Xunta e aprobarse de forma definitiva.

Xunto aos orzamentos, o consello de goberno tamén deu o visto bo ao límite de prazas de novo ingreso en grao e máster para o curso 2024/2025, que nesta ocasión ascende a 5.060 prazas, unha cifra “moi similar” ao curso pasado.

Así mesmo, na sesión “de marcado carácter económico”, segundo recolle o Diario da Universidade de Vigo (UVigo), aprobouse o teito de gasto non financeiro para 2024, con 180,2 millóns de euros.

O reitor, Manuel Reigosa, mostrouse “absolutamente tranquilo” cos orzamentos, insistindo na idea de que as contas “están ben botadas” e que o seu equipo deixará “moi ben encamiñada a Universidade para o futuro”.