O goberno municipal de Vigo acusou aos bombeiros de utilizar a Medalla de Ouro da cidade con “fins partidistas” e sinalou que a súa devolución ao alcalde, escenificada este venres por un grupo de funcionarios do servizo, “supón deshonrar á cidade de Vigo”.

Así o trasladou o portavoz do goberno vigués, o edil socialista Carlos López Font, nunhas declaracións gravadas e remitidas aos medios. Segundo sinalou, a Medalla de Ouro de Vigo (outorgada aos bombeiros en 2009) “é da cidade” e concedéuselle a este colectivo “como recoñecemento a ducias de anos de historia, polos servizos prestados”.

Para o goberno de Vigo, “recibir a Medalla é unha gran distinción e ninguén pode facela súa e utilizala con fins partidistas”. “Rexeitar a Medalla da cidade por intereses particulares supón deshonrar á cidade de Vigo”, proclamou López Font.

“O que queren algúns efectivos do corpo de bombeiros é montar leas, e válelles todo. Non poden arrogarse a historia do corpo de bombeiros de Vigo e o impecable servizo público prestado por centos de integrantes deste corpo ao longo dos seus cen anos de historia”, subliñou o portavoz do goberno municipal.