A Fase I da humanización da Avenida de Samil comezará a finais do próximo mes de xaneiro e suporá un investimento de 1,8 millóns de euros, segundo anunciou o alcalde, Abel Caballero.

A pesar de que en marzo deste ano o rexedor asegurou que as obras comezarían “a finais de setembro”, agora marcou como data de inicio finais de xaneiro. Este atraso, de cumprirse as palabras de Caballero nesta ocasión, fará que os traballos coincidan coa tempada de praia, xa que teñen unha duración prevista de nove meses para a súa execución.

Segundo o alcalde, a xunta de goberno local aprobará este venres a adxudicación das obras para a humanización da vía nun tramo de 450 metros entre o extremo da praia de la Fuente e a zona da pista de patinaxe. O investimento ascenderá a 1,8 millóns de euros.

Pola súa banda, o Goberno central investirá máis 2,1 millóns de euros na recuperación da praia e no novo paseo no mesmo tramo. “Imos recuperar de forma extraordinaria a praia de Samil, con máis areal, máis paseo, máis aparcadoiro, máis humanización e mellores condicións”, concluíu Abel Caballero nun audio enviado aos medios de comunicación.