As miles de saídas programadas para este mércores, festivo polo Día da Constitución en España, xeraron varios quilómetros de retencións na saída de Galicia cara a Portugal pola A-55. Segundo confirman a Europa Press fontes da Dirección Xeral de Tráfico (DXT), o peor momento foi pasadas as 12,30 horas do mediodía, cando se chegaron a producir colas de ata cinco quilómetros.

E é que este mércores, 6 de decembro, é festivo en España polo 45 aniversario da Constitución, pero ademais celébrase a feira de Valença do Minho, que xa habitualmente provoca o desembarco de miles de galegos na vila lusa. A isto súmanse todos aqueles que opten por pasar a ponte de decembro en diferentes localidades do país veciño.

Pasadas as 14,00 da tarde, a situación normalizouse e practicamente só queda un quilómetro de atasco a partir do quilómetro 30 da A-55 e os coches están a entrar e saíndo en Tui “con normalidade”. No resto da rede viaria galega, tal e como destaca a DXT, a situación é practicamente a habitual dun día festivo.