O alcalde de Vigo, Abel Caballero, celebrou este luns o “cheo apoteósico” rexistrado o pasado fin de semana na cidade, coa chegada de miles de persoas e o “cento por cento” de ocupación en establecementos hoteleiros, aínda que sen facer referencia aos problemas de tráfico derivados desa afluencia masiva de visitantes.

Nun audio gravado e remitido aos medios, o rexedor olívico subliñou que a campaña do Nadal da cidade “está a ser excepcional” e recalcou que o nivel de ocupación dos aloxamentos o pasado fin de semana foi “do cento por cento”.

Nese sentido, explicou que o volume de visitas foi “grandioso”, e foi raro o concello galego que non organizase excursións a Vigo. A iso hai que sumar a chegada de “decenas de miles” de cidadáns portugueses, tendo en conta que o pasado venres foi festivo no país veciño.

Así, Caballero celebrou o “cheo apoteósico” en hoteis e restaurantes, “os comercios vendendo” e a gran afluencia nas atraccións e actividades deste “Nadal excepcional”. “Toda España quere ser Vigo”, proclamou.

O alcalde, no entanto, non fixo referencia aos problemas de tráfico que, sobre todo o venres, colapsaron os accesos á cidade (e que, por exemplo, obrigaron a suspender un acto coa ministra Pilar Alegría, porque quedou ‘atrapada’ no atasco), e provocaron escenas xa vividas o ano pasado, de grandes colas en viarias do centro urbano, ou vehículos aparcados nos accesos do túnel do Beiramar.