O grupo automobilístico Stellantis comprometeuse co comité de empresa da súa fábrica de Vigo a adxudicar á planta a súa nova plataforma eléctrica, prevista para 2027-2028. Así o sinalou a dirección da factoría á representación dos traballadores durante a sétima reunión de negociación do novo convenio colectivo, levada a cabo na cidade olívica na mañá deste xoves.
“Nun contexto de descarbonización e de regulación de emisións da Unión Europa, a adxudicación da seguinte arquitectura de vehículos eléctricos convértese nun obxectivo imprescindible para o mantemento da actividade industrial do centro máis aló de 2027”, subliñou a compañía.Tendo en conta isto, o consorcio adquiriu o compromiso de adxudicar ao centro de produción de Vigo a próxima arquitectura de modelos eléctricos, previsiblemente a STLA Small.
“No caso de que esta nova arquitectura de vehículo non sexa asignada á planta, calquera das partes poderá solicitar automaticamente a reapertura das negociacións do Convenio Colectivo 2024-2027, debendo ser este reconsiderado no seu conxunto”, sentenciou a empresa.
