O goberno municipal de Vigo iniciou a tramitación do expediente para aprobar unha modificación de crédito por valor de algo máis de 330.000 euros, para dar cumprimento a unha sentenza do Tribunal Superior de Xustiza de Galicia, de marzo pasado, que lle condena a abonar esa cantidade á Asociación Profesional de Empresarios Autónomos do Mercado do Progreso, por obras realizadas nesas instalacións municipais.
A resolución xudicial confirma unha sentenza de instancia e establece que o Concello debe resarcir a estes comerciantes por unhas obras de acondicionamento dos postos, reforzo estrutural do Mercado, reforma dunha sala técnica, e instalación de frío e xeo, uns traballos que “exceden a consideración de ser obras de mera conservación, mantemento ou reparación dos postos”.
Así mesmo, entre outras consideracións, o TSXG sinala que as obras realizadas, “que foron necesarias para o contrato (de concesión e explotación do Mercado) puidese comezar o seu andandura e cumprise así a súa finalidade”, van reverter a favor do Concello cando finalice o período de concesión, de 25 anos. “Polo que é xusto que o ente local peche co seu importe, pois en caso contrario estar a enriquecer inxustamente á conta da parte apelada”, reza a sentenza.
Finalmente, lembra o alto tribunal galego, que as obras en cuestión foron planificadas polo Concello nun proxecto de 2010 pero que, progresivamente, “polas razóns que fosen”, fóronse detraendo nos sucesivos proxectos posteriores, “véndose abocada a Asociación entón a soportalas para levar a efecto a concesión do Mercado do Progreso de Vigo”.
Para dar cumprimento a esta sentenza, a Xunta de Goberno Local aprobou o pasado 10 de novembro, nunha reunión extraordinaria e urxente, o expediente de modificación de crédito para pagar eses 330.000 euros.
