O Equipo@coruña de Asesoramento Prevención e Resposta contra a Ciberdelincuencia da Comandancia da Garda Civil da Coruña detivo a un veciño de Vigo como presunto autor dun delito de estafa e outro de falsidade documental por realizar cargos co cartón doutra persoa por valor de 1.200 euros.
Segundo informou o Instituto Armado, a investigación iniciouse por mor da denuncia interposta pola vítima nas dependencias oficiais da Garda Civil de Cambre. Nela comunicaba a realización de cargos non autorizados na súa conta bancaria por un importe total de 1.200 euros.
Así, a Garda Civil investigou os feitos para tratar de constatar a súa veracidade e identificar o autor ou autores no seu caso. Deste xeito, os axentes pescudaron que o agora detido conseguira os datos do cartón bancario da vítima, utilizándoos para abrir unha conta cunha identidade falsa nunha plataforma intermediaria de pagos, realizando a través da mesma os pagos de produtos tecnolóxicos comprados en liña.
Tras a análise da información solicitada, os axentes que interviñeron no operativo lograron a identificación plena do presunto autor dos ilícitos, un home con domicilio na cidade de Vigo.
A continuación, procederon á detención desta persoa como presunto autor dun delito de estafa e outro de falsidade documental, póndoo, xunto coas actuacións realizadas, a disposición do Xulgado de Instrución de garda da Coruña.
