A Xunta de Goberno do Concello de Vigo reuniuse en sesión extraordinaria este venres ao mediodía para aprobar a proposta de adxudicación da iluminación do Nadal, así como a programación de actividades desta campaña.

A empresa andaluza Ximénez foi a única que se presentou a esta licitación, adxudicada por case 9,5 millóns de euros e, tras a entrega de documentación adicional solicitada pola Mesa de Contratación, este órgano deu luz verde na mañá deste venres á oferta (coa abstención dos representantes de BNG e PP).

Por outra banda, a Xunta de Goberno aprobou tamén a programación de actividades para a campaña do Nadal, que inclúe o mercadillo Cíes Market da zona da Alameda, as atraccións no ámbito de Areal, a pista de xeo en Samil, o Belén monumental, a nora xigante ou unha exposición de dinosauros.

O Concello informou da adopción de medidas, “tendo en conta a experiencia das pasadas edicións e coa vontade de mellora continua”. Entre as medidas, destaca a redución do horario de funcionamento das atraccións, a retirada das atraccións máis “ruidosas” situadas en Areal, o traslado da cola para acceder á nora (pasa a facerse por Areal, para liberar a rúa Colón), a limitación de dispositivos acústicos, como bucinas ou altofalantes, ou a supresión de música ambiente na contorna de Areal (cuxos veciños denunciaron ante os xulgados os ruídos) e a súa redución noutras rúas.

Tamén se informou de que non se permitirá a iluminación do arboledo catalogado na Praza de Compostela (Alameda) e que se liberará espazo de casetas no mercadillo desa zona para facilitar a mobilidade na contorna da nora.

Por outra banda, o Concello tamén avanzou que realizará un estudo de tráfico para facilitar a mobilidade dos residentes das zonas onde hai actividades, e que se fará un estudo acústico para garantir o cumprimento da normativa de ruídos, ademais de incrementar o control policial, principalmente os días de gran afluencia de persoas.