A asociación Sociedade Xitana Española pediu este xoves “xustiza e non vinganza” polo incendio rexistrado este pasado mércores en Vigo, que se saldou con catro persoas falecidas, unha nai e tres dos seus fillos menores.

Así o sinalou ante os medios de comunicación o presidente da entidade e que noutro tempo se autotitulaba como “Príncipe dos xitanos” de Galicia, Sinaí Giménez, –que tamén foi candidato ás eleccións locais en Vigo– quen apuntou directamente cara a dúas persoas como sospeitosas de provocar o lume no edificio da rúa Alfonso X O Sabio.

Segundo el, varias testemuñas viron a dous homes saír do edificio con garrafas de gasolina. Un deles sería un home que okupara un piso do inmoble e sería expulsado por “conflitivo” hai semanas, asegurando que “se el non vivía alí, non ía vivir nin Deus”, segundo relataron veciños.

A pesar diso, fontes da investigación consultadas por Europa Press aseguraron que a Policía mantén abertas todas as liñas de investigación do incendio, á espera do informe dos axentes da Científica. Ademais, subliñan que non se levaron a cabo detencións polo caso e que as primeiras investigacións apuntan a que “non hai indicios” de que o lume fose provocado.

VIVENDAS SOCIAIS

Entre outras solicitudes, Giménez insistiu en pedir ao Concello de Vigo e directamente ao alcalde, Abel Caballero, vivendas sociais para as familias que vivían no edificio incendiado “e que quedaron sen casa”.

El subliñou a importancia de que as administracións “atendan aos máis pobres”, non só neste caso, senón en xeral, para evitar que se produzan situacións similares.