Máis de 200 académicos de ducias de países debaten en Vigo sobre a educación como motor transformador para un mundo interconectado e equitativo durante o congreso internacional STAR Global Conference 2023, organizado por STAR Scholars Network e a Cátedra Unesco da Universidade de Vigo.
Tal como recolle o Diario da Universidade de Vigo (DUVI), STAR Scholars Network é un foro internacional de académicos que promove a mobilidade social global mediante o uso da investigación e no que traballan uns 15.000 docentes e estudantes a través das fronteiras de 2.353 universidades de 115 países.
Para a edición deste ano da súa conferencia anual, esta rede aliouse coa Cátedra da Unesco da UVigo, convertendo á cidade olívica estes días no “epicentro mundial” do seu debate sobre o papel da educación nun contexto de globalización e hiperconexión.
Son máis de 200 persoas as que participan nesta conferencia, das cales unhas 140 fano de forma presencial, sendo a primeira vez que este encontro internacional leva a cabo en España.
No acto de apertura, celebrado este luns, participou, entre outros, a vicerreitora de Internacionalización, Maribel do Pozo, quen destacou a importancia de foros como este para debater sobre propostas innovadoras que camiñan cara a unha práctica educativa transformadora.
