O alcalde de Vigo, Abel Caballero, reclamou este luns que sexa o presidente da Deputación de Pontevedra, Luís López, como “autoridade máxima” da institución provincial, o que garanta o cofinanciamento da reforma da bancada de Gol no estadio de Balaídos, e urxiulle unha resposta, xa que o goberno local ten “moita présa” por encargar o proxecto definitivo e licitar as obras.
Nunhas declaracións remitidas aos medios, o rexedor olívico explicou que está “a preparar” outra carta para o presidente da Deputación para que sexa el quen “garanta a vocación da Deputación” de participar no financiamento da obra. Todo iso, despois de que a vicepresidenta da institución, Marta Fernández-Tapias, comparecese ante os medios para garantir o apoio provincial á obra e para pedir un acordo “claro e transparente”, no que tamén se escoite ao Celta, e concretando investimentos, prazos e outros detalles.
Abel Caballero asegurou que o Concello xa dispón do proxecto construtivo básico para a bancada de Gol, que é “simétrico” ao da bancada oposta, de Marcador, e está en disposición de remitilo á Deputación e ao Celta. A partir de aí, asegurou, o proxecto definitivo “será inmediato” e, a continuación, a contratación e a obra.
“Temos moita présa en construír a bancada de Gol. É importante tela acabada canto antes”, proclamou, antes de denunciar que a reforma se está atopando cunha nova dilación “outra vez pola Xunta”.
Así, explicou que o goberno local atópase á espera, desde hai máis de 4 meses, da resposta de Augas de Galicia á documentación remitida en maio polo Concello (que, á súa vez, respondía a uns requirimentos feitos polo organismo, dependente da administración autonómica).
