Axentes da Policía Local de Vigo detiveron a un veciño da cidade, Manuel B.G., de 69 anos de idade, tras exhibir e disparar un arma de fogo durante unha discusión relacionada cos seus cans, na contorna do parque de Castrelos.

Os feitos ocorreron pasadas as 18,30 horas deste xoves, cando a Policía recibiu unha alerta para acudir a este parque, por unha discusión entre dous homes motivada no parque caniño de Castrelos, e despois de que un deles sacase un arma de fogo e realizado disparos (un dos disparos impactou nunha árbore), sen alcanzar a ninguén.

Ao lugar acudiron en primeiro lugar efectivos de Policía Local, que acordoaron a zona, e localizaron ao sospeitoso na rúa Enrique Alonso Xalueiro, preto do paseo do río Lagares. Posteriormente membros da UDEV da Policía Nacional presentáronse no lugar e fixéronse cargo da investigación.

Segundo informaron fontes policiais, o suposto autor dos disparos, un home con antecedentes relacionados coa organización terrorista GRAPO, desfíxose da pistola nunha zona algo afastada de onde se produciu a discusión e mantense a procura da arma, que aínda non foi localizada.

O detido foi trasladado primeiro a un centro médico e durante o traxecto, informaron fontes policiais, o home non deixou de repetir que “ía matar” ao home co que discutira. Posteriormente, foi levado á Comisaría de Policía Nacional onde este venres se lle tomará declaración, antes de polo a disposición do xulgado de garda.