O comité de empresa da multinacional pesqueira Nueva Pescanova pediu á firma que suspenda o expediente de regulación de emprego (ERE) para negociar “solucións alternativas e de consenso” que cubran as necesidades actuais da compañía.
Así o sinalou nun escrito dirixido ao director de Persoas España e Corporativo da empresa, despois de que Nueva Pescanova informase da súa intención de iniciar o ERE para extinguir ao redor de cen contratos nas súas oficinas de Chapela, en Redondela (Pontevedra) e Madrid.
O comité lamentou que con anterioridade á notificación os representantes dos traballadores non tivesen a oportunidade de poder tratar a situación da empresa para evitar unha medida “tan lesiva” para os empregados.
Por iso, instaron a Pescanova a suspender o inicio do ERE para abrir unha fase de negociación co obxectivo de buscar “solucións alternativas e de consenso”.
“A nosa preocupación é máxima e por iso emprazamos á empresa a unha negociación sen condicionantes de tempo nin presións, buscando unha solución pactada fóra deste procedemento hostil, mantendo o bo clima social e de diálogo”, engade o comité na carta, onde rexeita o conflito “ou calquera medida traumática”.
Segundo os empregados, a compañía ten retos “importantes” nos próximos anos, polo que unha situación desta magnitude “pode pór en perigo a marca e a propia compañía”, restando “viabilidade e rendibilidade presente e futura”.
“Consideramos que hai suficientes elementos para chegar a un punto de encontro. Solicitámoslle que suspendan preventivamente a medida comunicada para pornos a traballar en solucións para exceder estas dificultades con responsabilidade e en beneficio de todos“, sentencia o comité.
Foi o pasado mércores, 6 de setembro, cando Nova Pescanova informou os comités de empresa e delegados sindicais a súa intención de iniciar este ERE, que xustifica “por causas económicas e organizativas” e que se cinguirá ás áreas de soporte de Chapela e Madrid.
Nun comunicado, a empresa apuntou que o obxectivo é “adaptarse a unha contorna global desafiante e asegurar a sustentabilidade da empresa a longo prazo”, e precisou que a regulación “afecta a menos dun centenar de traballadores, dos máis de 10.000 que integran a multinacional”, aínda que non concretou a cifra exacta.
