O secretario municipal do Concello de Vigo emitiu un informe, a petición da concelleira de Urbanismo, María José Caride, no que, entre outras consideracións, apunta que é legalmente viable ampliar os prazos para a aprobación provisional do novo PXOM, e con iso poder prorrogar a vixencia do instrumento de ordenación provisional (IOP), aínda que alerta de que, a partir do 16 de outubro, vaise producir unha situación de “ordenación discordante” nas licenzas que, a partir de entón, poderanse outorgar.
No seu informe, o alto funcionario explica que o próximo 16 de outubro decae a suspensión do outorgamento de licenzas (consecuencia da aprobación inicial da PXOM, hai algo máis de dous anos) e que, nese momento, se se amplían os prazos de aprobación provisional do Plan (como pretende o goberno local), a ordenación provisional manterá a súa vixencia.
Deste xeito, as licenzas que se outorguen a partir de entón basearanse nunha ordenación urbanística que “non coincidirá, polo xeral, coa inicialmente aprobada (en agosto de 2021) no PXOM en revisión” e “quizá tampouco coa que provisionalmente se aprobe (en dous meses, segundo anunciou Abel Caballero)”.
O secretario advirte de que se trata dunha “situación anómala” e que o pleno, “considerando o interese público en xogo e os fins do PXOM en revisión“, debe valorar “a fin de considerar a conveniencia de deixar, ou non, sen efecto o IOP”.
En todo caso, tamén apunta que, se non se mantén a ordenación provisional, a situación urbanística se retrotraerá ao plan de 1993 (o anterior en vigor, dado que o de 2008 foi anulado polo Tribunal Supremo), por tanto, tamén se producirá unha “discordancia”. Con todo, o secretario estima no seu informe que a incidencia desa ordenación discordante (entre a novo PXOM e o do 93) “pode ter consecuencias máis leves que a discordancia do IOP”.
AMPLIACIÓN DO PRAZO DE APROBACIÓN
A pesar destas advertencias, o goberno municipal levará a aprobación, na próxima reunión do Consello da Xerencia de Urbanismo (paso previo ao pleno) a proposta de ampliar en 3 meses o prazo para aprobar provisionalmente o novo Plan, dada a “imposibilidade material” de cumprir ese fito antes do fin do prazo, fixado para o 5 de outubro deste ano, e que pasará ao 5 de xaneiro de 2024.
Isto supón que tamén se ‘estiran’ os prazos de vixencia da ordenación provisional, regulada por unha normativa autonómica pero vinculada á tramitación municipal da PXOM. De feito, nos últimos días, o alcalde Abel Caballero anunciou que o goberno local prorrogaría por tres meses o IOP (aínda que o que se amplía é o prazo de aprobación do Plan) e, con iso, deu por “resolto” o problema de prazos.
Na proposta que irá á Xerencia de Urbanismo, asinada pola concelleira María José Caride, o goberno local apela á Lei de Procedemento Administrativo para ampliar ese prazo de aprobación do documento urbanístico, e xustifícao pola complexidade do mesmo, polos atrasos derivados do Covid e, fundamentalmente, polos atrasos na emisión de informes preceptivos de organismos dependentes da Xunta.
COMPETENCIA PARA APROBAR DO PLAN
Por outra banda, no seu informe, o secretario tamén responde a outra petición da concelleira de Urbanismo, que lle solicitaba aclarar cal era o organismo competente para aprobar provisionalmente a PXOM, tendo en conta do recolleito, entre outros textos, por un ditame do Consello Consultivo de Galicia do 6 de xuño de 2018 (que considera o alcalde como órgano municipal competente para aprobar provisionalmente o Plan).
O técnico expón que, segundo a Lei de Bases de Réxime Local, corresponde ao pleno ese trámite, e expresa a súa “respectuosa discrepancia” co ditame do Consello Consultivo. Así mesmo, engade que a aprobación por parte do pleno requirirá de maioría absoluta.
TRÁMITES ANTES DA APROBACIÓN
Finalmente, o secretario pronúnciase sobre todos os trámites que aínda restan por completar antes de chegar ao fito da aprobación provisional (que, segundo o alcalde, producirase nos próximos dous meses, mentres que a luz verde definitiva chegará “no primeiro semestre de 2024”).
En primeiro lugar, o equipo redactor debe presentar o documento, trámite que aínda non se produciu, e a Xerencia de Urbanismo debe remitir dilixencia a todas as áreas e servizos municipais. A continuación, o documento debe ser facilitado a todos os grupos políticos do Concello.
O seguinte paso é a emisión de informe por parte dos servizos xurídicos municipais sobre a integridade do expediente, actuacións administrativas realizadas e conformidade do Plan coa lexislación vixente, e no que, de ser o caso, constará a proposta de acordo para levar a pleno.
Neste punto, o secretario advirte de que a complexidade do documento e o seu volume debe levar a considerar un prazo “no que non predomine a urxencia” e, en todo caso, que sexa maior dos 10 días estipulados por lei, xa que é un tempo “insuficiente”.
Despois dese trámite, o expediente pasará pola secretaría xeral do pleno, e por Intervención. Concluída a tramitación do expediente, haberá que convocar ao Consello Social da cidade e, posteriormente, remitirase o expediente de novo á Xerencia de Urbanismo para ditaminar a proposta de acordo. Só entón, unha vez emitido o ditame, convocarase a sesión plenaria para a aprobación provisional da novo PXOM de Vigo.
