A Federación de Servizos Mobilidade e Consumo (FeSMC) de UGT constatou este mércores o “desinterese” da Xunta por garantir a seguridade na Cidade da Xustiza de Vigo, tras escoitar as declaracións do presidente Alfonso Rueda, negando recortes en seguridade e falando dunha reorganización de recursos ao concentrarse todas as dotacións xudiciais nun só edificio.

Para o sindicato, a posición da administración autonómica evidencia o “desinterese” por proporcionar os “medios mínimos e imprescindibles” de seguridade nesas instalacións, competencia da Xunta.

Segundo criticaron, falar de concentración de recursos “non é máis que un intento de desviar a atención e eludir a responsabilidade” que ten o goberno galego, e lembraron que os servizos de seguridade non só protexen ás persoas que acoden aos xulgados cada día, senón tamén os aveños, como probas ou documentación.

UGT advertiu de que a Cidade de Xustiza, non só pola actividade que acolle, senón polas súas características construtivas, “ten que ser catalogado como un edificio de especial relevancia dentro do campo da seguridade”, e ténselle que dotar dun servizo de vixilancia “de pronta resposta”, con vixiantes as 24 horas do día e os 365 días do ano.