Tres mulleres resultaron feridas leves tras saírse da vía o coche no que circulaban por Vigo e chocar contra unha marquesiña dunha parada de autobús, segundo informou a Policía Local.

O accidente tivo lugar pasada a medianoite deste martes, cando o 092 recibiu unha chamada para acudir á Avenida da Ponte debido a un sinistro de tráfico. Á súa chegada, os axentes observaron que, no interior do vehículo, había tres mulleres que, aparentemente, sufrían feridas leves. Minutos antes, perderan o control do coche e impactara contra unha marquesiña.

Como consecuencia do choque, ademais dos danos na estrutura da parada do bus, tamén se rexistraron danos nunha tubaxe, polo que se deu aviso aos técnicos da concesionaria Aqualia para reparar a avaría. Ata o lugar desprazouse, así mesmo, persoal do servizo de limpeza, e o guindastre para a retirada do vehículo.

MULTA POR OURIÑAR NA RÚA

Por outra banda, a Policía Local tamén informou da imposición dunha sanción a un cidadán que foi sorprendido ouriñando na rúa, detrás do museo Marco, na madrugada do pasado sábado. Ao ser interceptado, o home insultou aos axentes chamandoos “voitres de merda” e “carroñeiros”.