O BNG esixiu este luns a retirada de “toda a simboloxía fascista” das rúas de Vigo e criticou “a impostura e o cinismo” do goberno local de Abel Caballero con respecto á memoria histórica.
Así o trasladou nun comunicado o portavoz municipal do grupo nacionalista, Xabier Pérez Igrexas, horas despois de participar no acto institucional de homenaxe que o Concello fixo no cemiterio de Pereiró, en recordo dos alcaldes de Vigo e Lavadores asasinados, xunto a deputados e sindicalistas, nos muros do camposanto en 1936.
Para o edil do BNG este recoñecemento é “necesario pero insuficiente”, tendo en conta que “87 anos despois permanecen na cidade monumentos e símbolos erixidos polos responsables dos fusilamentos de Emilio Martínez Garrido, José Antela Conde e tantos e tantas demócratas de Vigo que defenderon mesmo coa súa vida a lexitimidade democrática, fronte ao horror do nacionalcatolicismo”.
Xabier Pérez Igrexas sinalou que o BNG non quere que permaneza “o máis mínimo rastro desa etapa de terror, sangue e represión” e proclamou que “é o momento de que o Concello de Vigo retome un compromiso real para a recuperación efectiva da memoria histórica e democrática”.
Nese sentido, propuxo a creación dunha comisión municipal para avanzar na retirada de todos os símbolos e vestixios da ditadura franquista, especialmente da cruz “fascista” de O Castro, “que ofenden a todos e todas as demócratas da cidade”.
Ademais, sinalou que é necesario “pór en valor e dignificar” os lugares da memoria da cidade, porque “hai que lembrar a quen matou o fascismo, por que mataron e que entregaron a súa vida os moitos heroes e heroínas que defenderon as liberdades democráticas que hoxe seguimos reivindicando plenamente”.
