A normalidade na volta á actividade da fábrica de Stellantis en Vigo durou só un día, xa que a falta de aprovisionamentos obrigou a suspender parte da produción só 24 horas despois da volta de vacacións.

Segundo informaron fontes da empresa ao persoal, “unha dificultade sobrevinda en aprovisionamento de pezas e no inicio de actividade dalgún dos provedores tras o período de vacacións” obrigou a parar a produción no sistema 2 (o que monta as furgonetas).

Deste xeito, cancélase a actividade na quenda de tarde deste martes nesa liña, así como na quenda de noite, e tamén na quenda de mañá deste mércores.

“A pesar de manter o fluxo tenso, está previsto reiniciar a actividade (para esta quenda) a partir das 14,00 horas deste mércores”, confirmaron.