A Fundación Laxeiro expón por primeira vez sete obras sobre papel, a lapis, carboncillo e acuarela, da época adolescente do artista galego. Entre este xoves 3 de agosto e o 15 de outubro, a fundación situada en Vigo exporá as obras, datadas a finais dos anos vinte e principios dos anos trinta, baixo o título ‘Laxeiro, paisaxes de adolescencia’.

Segundo explican nun comunicado, “estas pezas ilustran como un Laxeiro, aínda adolescente, aprendía a pintar e a debuxar a partir do seu territorio visual máis inmediato“. “As paisaxes rurais da comarca do Deza descóbrennos un Laxeiro paisajista insólito, pouco tempo antes de adoptar unha mirada propia que cambiaría o tema da paisaxe por escenas con personaxes, coas que foi construíndo a súa singular obra”, relatan.

As obras corresponden a un Laxeiro entre os 18 e os 22 anos e mostran ensaios de liña, de cor e de composición; exercicios de selección do encadre nos que “o tema aínda non era unha preocupación e o seu futuro como artista aínda era unha incógnita, un desexo incerto que o novo pintor alimentaba de forma autodidacta, cunha vontade inquebrantable”. “‘Laxeiro, paisaxes de adolescencia’ quere mostrar a mirada virxe dun mozo aprendiz de artista que, ao longo do século XX cambiaría a pintura galega para sempre“, conclúen.