InicioCulturaVolven as actividades de observación astronómica no parque nacional das Illas Atlánticas

Volven as actividades de observación astronómica no parque nacional das Illas Atlánticas

A Federación Galega de Astronomía e Radioastronomía (Fegar) encargarase de dirixir e coordinar as distintas accións de dinamización previstas para difundir os valores que desde o ano 2016 acreditan a este espazo natural como destino turístico 'Starlight'.

PUBLICADO O

As actividades gratuítas de observación astronómica, promovidas polo Parque Nacional marítimo-terrestre das Illas Atlánticas de Galicia, estenderanse ata o 11 de setembro.

Segundo trasladou a Vicepresidencia Segunda e Consellería de Medio Ambiente, Territorio e Vivenda, estas actividades teñen como obxectivo dar a coñecer entre os visitantes unha parte destacada dos seus recursos naturais: o ceo.

Deste xeito, a Federación Galega de Astronomía e Radioastronomía (Fegar) encargarase de dirixir e coordinar as distintas accións de dinamización previstas para difundir os valores que desde o ano 2016 acreditan a este espazo natural como destino turístico ‘Starlight’.

Para logralo, Fegar contará coa colaboración e apoio loxístico do persoal do Parque Nacional no desenvolvemento das actividades, que son de carácter gratuíto e están dirixidas a distintos sectores da poboación, incluído o público infantil.

A Xunta subliñou que os destinos ‘Starlight’, un selo avalado pola Unesco e outorgado pola Fundación Starlight, son lugares visitables que gozan de boas óptimas para a contemplación dos ceos estrelados e que, ao estar protexidos da contaminación lumínica, resultan especialmente adecuados para albergar todo tipo de actividades turísticas baseadas neste recurso natural.

ACTIVIDADES DIÚRNAS E NOCTURNAS

Neste sentido, a programación astronómica prevista para este verán nas Illas Atlánticas inclúe observacións tanto diúrnas como nocturnas durante as cales se porá a disposición dos participantes material óptico de “última xeración e equipos electrónicos”.

Así mesmo, as actividades programadas para as mañás levarán a cabo entre as 13,30 e as 14,00 horas e centraranse na observación solar a través dun telescopio deste tipo en lonxitude de onda alfa, para ver as protuberancias e a evolución das manchas solares, ademais do tránsito de diferentes obxectos celestes.

Ademais, a observación astronómica en sentido estrito desenvolverase polas noites, concretamente no Lago dos Nenos e na Pedra da Campá, no caso das Illas Cíes; e en Caniveliñas, en Ons. Realizaranse tamén unha serie de actividades de exploración de corpos celestes dirixidas a nenos, así como de observación de meteoritos, incluíndo a choiva das Perseidas do mes de agosto.

A programación chegará ao catro arquipélagos aínda que a oferta concentrarase en Cíes, coa novidade este ano de que haberá actividades ‘Starlight’ durante todos os días do mes de agosto, así como do 1 ao 3 e do 8 ao 10 de setembro, e en Ons, con actividades programadas do 11 ao 14 de agosto e, no mes de setembro, do 1 ao 3 e do 8 ao 11. Na illa de Sálvora, esta actividade desenvolverase o 19 de agosto, e en Cortegada o día 22 do mesmo mes.

Para poder participar nalgunha destas accións, os interesados deberán inscribirse previamente na propia illa. Ademais, como estas son actividades ao aire libre, a súa celebración dependerá das condicións meteorolóxicas, polo que este calendario é susceptible de sufrir alteracións.

ÚLTIMAS

(Vídeo) Dioivo rompe o escenario no seu novo videoclip: o metal galego en todo o seu esplendor

O dúo vigués de metal en galego Dioivo acaba de lanzar un novo videoclip para o seu...

A Xunta pide ao Concello de Vigo “axilizar ao máximo” o seu informe sobre a PXOM

A Xunta de Galicia pediu ao Concello de Vigo que "emende os erros detectados"...

O Goberno traslada “tranquilidade” polo crime da maleta que, por agora, non se considera violencia de xénero

O subdelegado do Goberno en Pontevedra, Abel Losada, trasladou este luns unha "mensaxe de tranquilidade" sobre...

A CEG aborda con Caballero as necesidades de transporte de Vigo e insiste en pedir que o tren chegue ao porto de Bouzas

O presidente da Confederación de Empresarios de Galicia (CEG), Juan Manuel Vieites, reuniuse este luns co...