A delegada territorial da Xunta en Vigo, Ana Ortiz, e o director de Turismo de Galicia, Xosé Merelles, presentaron este venres o festival Iacobus Maris Experience, que se celebrará na cidade olívica entre o 28 e o 30 de xullo e que contará con concertos, casetas de comida e bebida ou actividades para nenos e maiores.
Nun acto celebrado no peirao de Portocultura, no que tamén estiveron presentes o director da Fundación Traslatio, Celso González, e o presidente da Autoridade Portuaria, Carlos Botana, os representantes autonómicos mostraron o apoio do Goberno galego a esta nova edición do evento, que se celebrará no peirao de Transatlánticos.
Organizado pola Fundación Traslatio co patrocinio da Xunta, este festival contará con numerosas actividades e talleres, ademais dun espazo gastronómico de cociña do mar e música en directo para todos os públicos.
Ortiz explicou que serán tres días cheos de actividades para nenos e maiores, con xogos infantís, casetas de comida e bebida, concertos na noite do venres e do sábado e visitas guiadas á goleta ‘Atyla’ e ao buque ‘Hidria II’.
“Eventos como esta ruta marítima contribúen de forma decisiva e sen dúbida a potenciar Vigo no lugar que se merece, reivindicando o seu papel central no Camiño de Santiago”, subliñou a delegada da Xunta na cidade.
