Decenas de afiliados a UGT e traballadores da concesionaria do servizo de lavandaría dos hospitais públicos de Vigo concentráronse este mércores no Hospital Meixoeiro ante o despedimento dun candidato ás eleccións sindicais.
Nun comunicado, UGT denunciou que a empresa Elis Manomatic despediu a este traballador por “exercer o seu lexítimo dereito de representación sindical e de defensa dos dereitos laborais dos traballadores”.
Por iso, o sindicato convocou concentracións este mércores e xoves diante do Hospital Meixoeiro a partir das 11,00 horas, en protesta polo despedimento.
Con todo, o comité de empresa (CIG e CC.OO.) non acudiu a apoiar este “inxusto despedimento”, segundo lamentou UGT. “Descoñecemos os motivos polos que os representantes dos traballadores non participaron, pero desde logo é evidente que non desexan representar a todos os traballadores”, criticaron.
