O Porto de Vigo recibiu este mércores a case 10.000 turistas nunha dobre escala de cruceiros, protagonizada pola visita inaugural do Disney Dream, que compartiu peirao co xa habitual Ventura.

Tal como informou a Autoridade Portuaria nun comunicado, o seu presidente, Carlos Botana,visitou o novo buque e deu a benvida ao seu capitán, co que participou no tradicional intercambio de metopas a bordo.

O Disney Dream é o terceiro barco da frota Disney. Foi inaugurado en xaneiro de 2011 e ten 340 metros de eslora, con capacidade para acoller a 4.000 pasaxeiros en 16 cubertas. Procedente de Lisboa, chegou a Vigo minutos antes das 08,00 horas deste mércores e partirá pasadas as 16,00 horas cara a Lle Havre (Francia), con case 3.700 pasaxeiros e 1.500 tripulantes.

Pola súa banda, o seu compañeiro de peirao, o Ventura, chegou antes das 07,00 horas desde Santander e quedará tamén ata as 16,00 horas, cando sairá con destino Lisboa. Nel viaxan case 3.400 persoas, na súa maioría británicos, e 1.189 tripulantes.