Os portos de Vigo e Lorient asinaron este luns un acordo de colaboración “histórico” en materia pesqueira co obxecto de fortalecer as relacións comerciais.

A rúbrica foi protagonizada polos máximos responsables portuarios de ambos os portos, Carlos Botana e Olivier Lle Nézet, en presenza do conselleiro do Mar, Alfonso Villares, e o alcalde da cidade portuaria de Francia, Fabrice Loher, xunto a representantes de institucións galegas e francesas.

Pola súa banda, o presidente da rada olívica destacou “a importancia deste irmandamento para o sector pesqueiro vigués”, xa que afecta a máis de 14 buques de bandeira francesa que descargan no Porto de Vigo, o que supón case un 42% do total da frota gransolera.

Neste sentido, Botana apuntou que este documento ten como propósito “marcar o inicio dunha procura conxunta de mecanismos de cooperación en materia de economía azul”, na que ambos os países, rexións e portos “están xa traballando”, así como impulsar o comercio de peixe e comezar a traballar nunha liña de colaboración “mutua” en aspectos comerciais e xurídicos para defender conxuntamente o sector.

“Apostamos por crear unha rede de portos pesqueiros sustentables a nivel europeo, que conte con todas as garantías legais, ambientais e sociais, fronte ás pesqueiras doutros países e que defenda a transparencia e a rastrexabilidade do peixe, a innovación, a formación dos pescadores e a protección do medioambiente”, remarcou.

Este acordo forma parte da política da Autoridade Portuaria de Vigo para atraer máis pescado á Lonxa de Vigo e revitalizar o porto pesqueiro olívico e, ademais, achega dúas institucións, de dúas culturas hermanadas polas súas tradicións, que creará sinerxías e oportunidades comerciais e favorecerá un achegamento económico e cultural de dous portos pesqueiros con grandes similitudes.