Dúas persoas resultaron feridas ao chocar un camión e dous turismos en Vincios, no municipio pontevedrés de Gondomar. Os dous feridos foron evacuados ao Hospital Álvaro Cunqueiro a bordo dunha ambulancia.

Segundo informou o CIAE 112 Galicia, foi o condutor do camión, que transportaba produtos alimentarios, o que informou sobre as 14,30 horas do accidente e explicou que acababa de chocar contra dous turismos no quilómetro 13 da PO-331. A consecuencia do choque, o carril de circulación quedou cortado.

No operativo participaron, ademais de Urxencias Sanitarias de Galicia-061, a Garda Civil de Tráfico e os servizos de mantemento da estrada, que se encargaron da limpeza da vía para restablecer as condicións seguras de circulación.