Carlos Botana Lagarón tomou posesión este venres do seu cargo como presidente da Autoridade Portuaria de Vigo, nun acto no que reafirmou a aposta do organismo polo ‘crecemento azul’ e no que ofreceu “escoita activa” aos axentes e institucións vinculadas coa actividade portuaria. A toma de posesión, na que participaron o presidente da Xunta, Alfonso Rueda, e o presidente de Portos do Estado, Álvaro Dapena, entre outras autoridades, celebrouse na Estación Marítima ‘Alberto Durán’.
Tras asumir o seu cargo, Botana Lagarón sinalou que esta “nova etapa” estará marcada polo diálogo e a procura de consenso, para traballar en solucións innovadoras que permitan crear “o porto do futuro”. “Todos sodes claves, e sen vós este porto do presente e o futuro non sería posible”, subliñou, dirixíndose aos membros da comunidade portuaria.
O novo presidente do Porto puxo en valor o potencial da terminal viguesa no ámbito pesqueiro, e tamén a presenza dun sector naval “con ampla experiencia e grandes oportunidades coa transición enerxética”. Así mesmo, fixo referencia ao compromiso do Porto coa preservación do medio mariño.
“APOSTA VALENTE”
Pola súa banda, o presidente da Xunta, Alfonso Rueda, destacou o perfil de Botana para asumir o temón do Porto olívico, un perfil ideal para impulsar a competitividade da terminal e a súa capacidade loxística. No acto de toma de posesión, o presidente galego proclamou que “é unha aposta valente encabezar unha organización da que formou parte, da que coñece todo, as fortalezas e debilidades”.
