A Asociación de Industrias do Metal e Tecnoloxías Afíns (Asime) de Galicia denunciou este venres a actitude dos sindicatos do metal na provincia de Pontevedra, a quen atribúe “motivacións políticas” para manter as xornadas de folga con motivo da negociación do convenio, e aos que acusou de pretender “enganar” aos traballadores e á sociedade.

Nunha rolda de prensa, o secretario xeral de Asime, Enrique Mallón, dirixiu duras críticas ás centrais sindicais e reprochoulles que optasen por exercer a folga con actos de “barbarie”, como os vividos nas inmediacións do Ifevi a pasada semana con motivo da Feira Mindtech. Ao seu xuízo, tratábase de accións “planificadas”, que causaron grandes “desfeitas” e danaron a imaxe do sector, e reiterou que se emprenderán accións legais.

Ademais, engadiu, gran parte das persoas que participaron nas protestas “non eran traballadores do sector” e insinuou que as centrais pagaron a esas persoas para realizar eses actos violentos.

Segundo Mallón, a folga ten un transfondo político, e asegurou que se produciron conversacións entre certo partido político e certo sindicato (que non nomeou especificamente, pero pódese deducir que se refire a a CIG) encamiñadas a manter a presión só ata as eleccións xerais do 23 de xullo.

NEGOCIACIÓN

Con respecto á negociación do convenio, o secretario xeral de Asime acusou aos sindicatos de realizar afirmacións “rotundamente falsas” relativas aos termos que se están discutindo. “Pretenden enganar aos cidadáns e aos propios traballadores. Os números están aí, retamos aos sindicatos a que os rebatan”, proclamou.

Así, volveu a repetir que o convenio do metal de Pontevedra é o mellor convenio sectorial de España a nivel de salarios, e que a patronal está a ofrecer subidas do 2 %, 3 % e 3 % (máis un 1 % adicional en función do IPC) para o tres anos de vixencia.

Ademais, advertiu de que a patronal non aceptará baixo ningún concepto a subrogación demandada polos sindicatos, e criticou que, tal e como está exposta, beneficiaría só ao 0,1 % dos traballadores que, “casualmente”, son na súa maioría afíns a un determinado sindicato. “Din que temos que pasar por todas as súas pretensións, isto non é unha negociación, é unha ditadura absoluta”, aseverou.

Enrique Mallón volveu a insistir en que a patronal segue disposta ao diálogo, e “nunca” abandonou a mesa, aínda que advertiu de que ese diálogo non se retomará mentres estean convocados os paros (os próximos serán o 6,7, 12 e 13 de xullo). Ademais, afeou ás centrais que pidan aos empresarios volver sentar, mentres, doutra banda, continúan as actuacións violentas.

De feito, na rolda de prensa, o responsable de Asime fixo públicas unhas imaxes captadas polas cámaras de seguridade da asociación, pouco despois das 14,00 horas do pasado mércores. Nelas, explicou, vense varias persoas encapuchadas lanzando por encima do enreixado de peche da sede de Asime, varios botes de pintura e un artefacto pirotécnico.