InicioSociedadeA promotora insiste en que tiña o compromiso de Caballero para o...

A promotora insiste en que tiña o compromiso de Caballero para o patrocinio de Guns N’ Roses e irá aos tribunais

Segundo a empresa, o propio Concello pediulle organizar o concerto e prometeu "contribución económica e cesión do recinto"

PUBLICADO O

A promotora musical Live Nation denunciará ante os tribunais a “actuación arbitraria” do Concello de Vigo ao declarar deserto o concurso de patrocinio do concerto de Guns N’ Roses, celebrado o pasado luns no estadio municipal Abanca Balaídos, e desvelou que tiña un “compromiso por escrito” seis meses antes de que se licitase ese concurso.

Esta licitación do patrocinio, de case 2 millóns de euros e iniciada pola administración local en abril deste ano, foi declarada deserta por non emendar correctamente a documentación a única empresa presentada, Sweet Nocturna, socia local de Live Nation.

A través dun comunicado feito público pola Asociación de Promotores Musicais, Live Nation España lamentou as “prácticas indebidas do Concello de Vigo” e acusou directamente ao alcalde, Abel Caballero, de “incumprir un compromiso persoal coa promotora”.

Así, asegura que o propio rexedor solicitou a finais do ano pasado ás promotoras Live Nation e Sweet Nocturna a organización de “dous grandes concertos en Balaídos”. “Tras unha reunión en outubro, Live Nation comunicou a posibilidade de dispor dunha data da mítica banda Guns N’ Roses, tras o cal asinouse un documento de compromiso ese mesmo mes, no que se especificaba, por parte do Concello de Vigo, a contribución económica e a cesión do recinto”, recoñece a empresa.

A partir de aí, en febreiro Live Nation confirmou o visto e prace para anunciar a data e empezouse a planificar “o lanzamento da noticia”. O Concello colaborou coa promotora para aprobar “os deseños de lanzamento que incluían a presenza dos logotipos oficiais das institucións”.

ANUNCIO E LICITACIÓN DO PATROCINIO

En febreiro anunciouse a data do concerto e anticipouse que as entradas sairían á venda en marzo, e a finais de abril o Concello publicou o prego de licitación dun patrocinio de case 2 millóns de euros para un concerto dunha banda internacional, a celebrar nunhas datas determinadas de xuño e cuns requisitos moi concretos, sen aludir en ningún momento a Guns N’ Roses.

Nesa tramitación, a mesa de contratación cuestionou a documentación presentada pola única licitante, Sweet Nocturna, en relación coa acreditación de que a promotora tiña en exclusiva os dereitos para organizar o evento desta banda. Así, a principios de xuño confirmouse que o procedemento quedaba deserto, porque a documentación achegada pola promotora non se consideraba válida.

Live Nation cualifica como “absurda” a decisión da mesa de contratación, e defendeu que a documentación presentada por eles e por Sweet Nocturna “foi válida durante 21 anos para realizar concertos deste tipo en Galicia (e no resto de España)”.

Con todo, a empresa continuou co proceso para obter a licenza do espectáculo e o concerto celebrouse igualmente na data prevista. Así, “os labores de montaxe dun espectáculo de tales dimensións xa comezaran e preto de 30.000 fans da banda compraran a súa tiquet, reservado aloxamento e feito os seus plans para gozar do concerto e da cidade de Vigo”.

“ARBITRARIEDADE NA TOMA DE DECISIÓNS”

A Asociación de Promotores Musicais trasladou a súa “gran preocupación ante a gravidade da situación” que afecta a este sector, que se ve “desprotexido” ante a “arbitrariedade na toma de decisións das administracións públicas” nos procesos de “resolución das axudas” ou de concesión de permisos.

“De igual maneira, consideramos que a resolución unilateral tomada neste caso concreto pode causar un precedente que poida pór en perigo a celebración de determinados concertos no noso país, xa que se cuestiona a validez de documentos que foron historicamente aceptados polas institucións e que contan co aval tanto das axencias que representan aos artistas como dos responsables á fronte das promotoras musicais que organizan o evento”, concluíu.

SILENCIO DESDE O CONCELLO

Mentres, desde o Concello, o alcalde e o resto do goberno local seguen gardando silencio respecto diso desta polémica. De feito, Abel Caballero hai semanas que non comparece en rolda de prensa ante os medios.

Cando se fixo público que a mesa de contratación declaraba deserto o concurso para o patrocinio, fontes municipais limitáronse a desmarcarse do evento, argumentando que non era organizado polo Concello e que, por tanto, era decisión da promotora continuar adiante co concerto pola súa conta e risco.

ÚLTIMAS

(Vídeo) Dioivo rompe o escenario no seu novo videoclip: o metal galego en todo o seu esplendor

O dúo vigués de metal en galego Dioivo acaba de lanzar un novo videoclip para o seu...

A Xunta pide ao Concello de Vigo “axilizar ao máximo” o seu informe sobre a PXOM

A Xunta de Galicia pediu ao Concello de Vigo que "emende os erros detectados"...

O Goberno traslada “tranquilidade” polo crime da maleta que, por agora, non se considera violencia de xénero

O subdelegado do Goberno en Pontevedra, Abel Losada, trasladou este luns unha "mensaxe de tranquilidade" sobre...

A CEG aborda con Caballero as necesidades de transporte de Vigo e insiste en pedir que o tren chegue ao porto de Bouzas

O presidente da Confederación de Empresarios de Galicia (CEG), Juan Manuel Vieites, reuniuse este luns co...