O Concello de Vigo, cuxa corporación está en funcións, celebrará este venres un pleno extraordinario para aprobar de forma definitiva a modificación de crédito de 1,8 millóns de euros para financiar o festival O Marisquiño, os concertos de verán en Castrelos e as festas nas parroquias.

Así o sinalou o alcalde en funcións, Abel Caballero, nunhas declaracións remitidas aos medios, nas que confirmou que será este venres cando se dea luz verde a esa modificación orzamentaria, que foi aprobada inicialmente en pleno o pasado 9 de maio.

Tras ese trámite, abriuse prazo de exposición pública e, unha vez analizadas as alegacións presentadas, estas foron desestimadas, e a modificación orzamentarias, que se fai con cargo a remanentes, será aprobada definitivamente, grazas á maioría do PSOE (a oposición abstívose no pleno de maio).

A XUNTA “ABANDONA” O MARISQUIÑO

Nas declaracións de Abel Caballero deste xoves, proclamou que a Xunta de Galicia “abandona O Marisquiño” e “non quere que se faga en Vigo”. “Considéroo da maior gravidade, ímolo a financiar desde o Concello e co que a Deputación de Carmela Silva financiou”, afirmou, ante este “novo ataque da Xunta á cidade de Vigo”.