A sección quinta da Audiencia Provincial de Pontevedra, con sede en Vigo, condenou con entre tres e cinco anos e medio de cárcere a oito acusados de tráfico de droga por menudeo na cidade olívica.

Tras o xuízo, levado a cabo o pasado mes de abril, o tribunal decidiu condenar con cinco anos e medio de cárcere a un matrimonio por dedicarse, desde o ano 2012, á distribución de sustancias estupefacientes, tanto das que causan grave dano á saúde, como das que non o causan.

Os maxistrados, que tiveron en conta a atenuante de dilacións indebidas, considerounos culpables dun delito de tráfico de drogas (catro anos e medio de prisión) e doutro delito de pertenza a grupo criminal (un ano de prisión). Ademais, tamén se lles impuxo a cada un deles o pago dunha multa de máis de 50.000 euros.

Pola súa banda, os outros seis acusados tamén foron condenados. En concreto, tres deles terán que pasar catro anos no cárcere e pagar 33.371 euros polos delitos de tráfico de drogas e pertenza a grupo criminal, mentres que os outros tres foron condenados a tres anos de prisión polos mesmos delitos e a unha multa de 20.000 euros.

“Para a realización desta actividade, (o matrimonio) servíase da colaboración prestada polo resto dos acusados”, subliña a sala, que considera probada que todos eles operaban “de forma estable, formando unha organización, na que se actuaba de maneira conxunta, seguindo as directrices que marcaba o matrimonio”.

No seu escrito, o Ministerio Fiscal xa indicaba que dous do oito acusados (o matrimonio) servíase da colaboración dos outros seis para entregar a droga aos clientes. O modo habitual de proceder consistía en que unha das acusadas recibía os encargos dos compradores e coordinaba o cliente con algún dos distribuidores ás súas ordes, aos que lle facilitaba a sustancia e indicáballe o punto de entrega.

O outro líder da organización en xeral xestionaba a recadación do diñeiro e efectuaba labores de vixilancia e control nos arredores do lugar de entrega, que habitualmente era nun bar ou cafetaría do barrio de Teis. Por iso, Fiscalía solicitaba cinco anos e medio de cárcere para os dous líderes da organización, que finalmente foron aceptados pola Audiencia.