O químico Nicholas Kotov será investido doutor ‘honoris causa’ pola Universidade de Vigo, nunha cerimonia que terá lugar o 12 de xuño ás 12,00 horas na Facultade de Ciencias Económicas e empresariais.
Nacido en Moscova e nacionalizado estadounidense, Kotov é unha referencia internacional en materia de nanoestructuras biomiméticas, e será o vixésimo noveno doutor ‘honoris causa’ da institución académica viguesa.
A proposta de investidura partiu dos profesores Luís Liz Marzán e Miguel Correa Duarte, con quen leva máis de 25 anos colaborando. Así, o departamento de Química Física aprobou a proposta por unanimidade en setembro de 2022 e o pasado 24 de xaneiro recibiu o respaldo por asentimiento dos membros do Consello de Goberno da UVigo.
Na cerimonia do 12 de xuño, que será aberta polo reitor, Manuel Reigosa, exercerá como padriño do homenaxeado o profesor Luís Liz Marzán, que será o encargado de repasar os méritos que levan a este científico a lograr o grao supremo de distinción que concede unha universidade.
A continuación, entregaráselle o título e o padriño daralle os atributos propios deste nomeamento: libro da ciencia e a sabedoría, anel e luvas brancas. Logo, Nicholas Kotov tomará a palabra para pronunciar o seu discurso de ingreso na UVigo.
Finalmente, o doutor ‘honoris causa’ realizará o xuramento co que se comprometerá a “defender e respectar todos os dereitos, privilexios e honras da Universidade de Vigo en calquera parte do mundo” e a “favorecela e axudala” cando se lle demande.
CAMPO DAS NANOESTRUCTURAS BIOMIMÉTICAS
Kotov é docente e investigador na Universidade de Michigan, Estados Unidos, e recibiu o recoñecemento Irving Langmuir Distinguished University Professor of Chemical Sciencies and Engineering, entre outros premios e distincións.
Ademais dos seus grandes logros científicos no campo das nanoestructuras biomiméticas, tamén destacou pola súa capacidade para recrear no seu laboratorio o proceso universal mediante o que ten lugar a ensamblaxe de estruturas biolóxicas moi complexas. Este químico sintetizou un gran número de materiais con propiedades extraordinarias que antes se consideraban inalcanzables.
COLABORACIÓN COA UVIGO
Algúns dos seus descubrimentos contaron coa colaboración de investigadores da UVigo, como Liz Marzán ou Correa Duarte. No seu traballo conxunto aplicaron o método de ensamblaxe ‘capa-por-capa’ para controlar a estrutura na nanoescala de nanocompuestos biomiméticos magnéticos e fotoluminiscentes.
Así mesmo, durante a elaboración da tese de doutoramento da profesora Isabel Pastoriza, identificáronse as propiedades plasmónicas e biolóxicas esenciais de diversos nanocompuestos autoensamblados.
Antes do acto de investidura, Nicholas Kotov asistirá á segunda edición de ‘The Thinking Institute’, unha reunión que terá lugar entre o 7 e o 9 de xuño no edificio Miralles do campus vigués no que se darán cita investigadores e expertos do ámbito da nanociencia.
